Ուսումնական շրջանի մասնագիտական զարգացման պարապմունքները վերսկսել ենք փետրվարի 26-ից:
Մասնագիտական զարգացման սեմինարները կրթության ոլորտում դասավանդման և ուսման որակի բարձրացմանն ուղղված մոտեցում է: Այն օգնում է կրթական համակարգը դարձնել ավելի ժամանակակից և արդյունավետ և օգնում է մանկավարժական աշխատողին ցուցաբերել արհեստավարժություն և նկատելի արդյունքներ…
Օրվա լուսաբանման շարունակությունը կարող եք կարդալ Ալվարդ Անդրեասյանի բլոգում:
Ուսումնական այս շրջանում մեր սեմինար-պարապմունքները անցկացնելու ենք արդեն սեբաստացի կենտրոնում՝ տիկին Շողիկի հետ: Այս անգամ արդեն խաղը շարունակելու ենք բույսերի հետ: Մարտ ամսվա առաջին երկու պարապմունքների ընթացքում ծանոթացանք սեբաստացի կենտրոնի բույսերի և նրանց առանձնահատկությունների հետ:
Մեր կրթահամալիրի միջավայրը այնպիսին է, որ անկախ քեզանից, անկախ մեր սեմինար պարապմունքներից, մենք դպրոցում մեր սովորողների հետ միշտ էլ զբաղվում ենք բույսերի խնամքով: Մայր դպրոցի Թե՛ դասարաններում, թե՛ միջանցքներում թե՛ տարբեր սրահներում և դահլիճներում կան բույսեր և դրանց խնամքով բոլորս զբաղվել և զբաղվում ենք: Իհարկե՛, տիկին Շողիկի շնորհիվ նաև նշում ենք որոշ առանձնահատկություններ և խնամքի հետ կապված նոր գիտելիքներ:
Սեմինարի ընթացքում Սեբաստացի կենտրոնի բույսերը մաքրեցինք, ջրեցինք, փխրեցրինք և գործնականում ունեցանք գեղեցիկ, թարմ, առողջ բույսեր:
Սեբաստացի կենտրոնի հե՛նց մուտքի դիմաց ֆիկուսն է. բավականին մեծ չափերով արդեն, հետաքրքիր էր ինձ տարիքը, բայց համեստությանս համաձայն չհարցրեցի… փոխարենը տիկին Շողիկը պատմեց դրա օգտակարության, թթվածնի հզոր աղբյուրի և անգամ հորմոնաստեղծ լինելու մասին:
Բույսը պայմանների նկատմամբ քմահաճ չէ: Աճի շրջանում պահանջում է մեծ քանակությամբ ջուր. հողի մակերեսը պետք է միշտ խոնավ լինի: Սակայն ձմռանը պետք է ջրելը սակավեցնել, քանի որ ջրի ավելցուկը կարող է բերել արմատների փտեցմանը: Ջրելու համար խորհուրդ է տրվում օգտագործել գոլ կամ սենյակային ջերմաստիճանի ջուր:
Ֆիկուսը ջերմասեր բույս է, բայց նախընտրելի է այն դնել ցրված լույսի տակ՝ արևի ուղիղ ճառագայթներից հեռու:
Երիտասարդ բույսերը պետք է դնել արևմտյան և հարավ-արևմտյան լուսամուտների մոտ՝ լուսավոր տեղերում: Լույսի պակասությունից տերևները կընկնեն, որի պատճառով էլ նա կկորցնի իր դեկորատիվ շքեղ տեսքը: Ամռանը լավ կլինի բույսը դնել դրսում՝ ստվերոտ տեղերում: Տերևները պետք է սրբել խոնավ շորով:
Ֆիկուսը շատ հետաքրքիր հատկություն ունի. թեպետ այն ջերմասեր բույս է և ջերմաստիճանի կտրուկ բարձրացումը նորմալ է տանում, սակայն ձմռանը սենյակի ջերմաստիճանը չպետք է բարձր լինի 15 աստիճանից: Եթե ձմռանը ֆիկուսը դրված լինի տաք տեղ, դա կակտիվացնի նրա աճը հունվար-փետրվարին, որը կթուլացնի բույսը և թույլ չի տա, որ նա գարնանը լավ զարգանա:
Բազմացվում է կտրոններով, որի համար գլխավորապես օգտագործվում են ճյուղերի ծայրամասերը: Կտրոնը պատրաստելու որոշ ժամանակ պետք է պահել գոլ ջրի մեջ մինչև կաթնահեղուկն ամբողջությամբ թափվի, հակառակ դեպքում դուրս հոսող հեղուկի մածուցիկության պատճառով մազանոթները կփակվեն, որի պատճառով կտրոնը կչորանա:
Այնուհետև այն պետք է դնել ջրի մեջ, որպեսզի արմատակալի: Արմատակալած կտրոնները պետք է տնկել 10-12 սմ-անոց տրամագծով փոքր թաղարների մեջ, որը սկզբնական շրջանում տարին մեկ անգամ պետք է տեղափոխել, աստիճանաբար մեծացնելով թաղարները, իսկ հետագայում ավելի ուշ-ուշ:
Սեբաստացի կենտրոնի բազմազան բույսերից մեկն էլ քլորոֆիտումն է, իսկ այս բույսի մասին կարդացեք Ալլայի բլոգում:
Բույսերի հետ աշխատանքը ևս թերապիա է, օգտակարի և գեղեցիկի համատեղում:
Անհամբեր սպասում ենք, մարտ ամսվա հաջորդ երկու պարապմունք սեմինարներին:
Իննա Ստեփանյան 